韋根齊心打殘懶散紅軍

猪拉多纳

24/03/2012
文： 江忠德

盃賽專家通常係形容中下游球隊，估唔到堂堂英超傳統Big4之一嘅利物浦都要做埋盃賽專家，雖然佢哋早前捧走英聯盃，足總盃又殺入4強，但日前於聯賽輸埋畀昆士柏流浪之後，近5輪英超竟輸足4場，今晚遇上要全力爭取護級嘅韋根，睇怕紅軍喺主場又要陷於苦戰。（有線200及300周六晚11:00直播）


利物浦雖然喺盃賽戰績優越，可惜踏入2012年後只係贏過兩場聯賽咁大把，佢哋之前唔夠曼聯砌可以話係技不如人，畀阿仙奴反勝可以賴欠運，但日前作客昆士柏流浪雖然一度領先兩球，最終居然被絕殺全失3分，完全係集中力唔夠同戰術單調。

近4次交手利物浦都贏唔到

領隊杜格利殊一直強調士氣同鬥志，冇錯！依家紅軍衝勁十足，球員滿場飛，但係睇落似自由發揮多過整體戰術運用，傳波失誤率高同比賽尾段防線崩潰，令到上場最終戰果逆轉，連士氣都輸埋，難怪利物浦遇親中下游球隊就冇晒符。


「國王」回歸後希望重新打造紅軍，但係攞唔到歐聯資格都幾難吸引球星加盟，反而要提防主將流失，家陣一眾戰將踢聯賽嘅心態唔易評估，反而對手韋根一條心搶分護級，近6場聯賽亦僅輸1仗，仲要近4次對住紅軍都唔輸，今晚去到晏菲路唔會心怯。