銀河艦隊搵皇蘇祭旗

猪拉多纳

24/03/2012
文： 洪心Dee

皇馬近排唔爭氣，搞到本身領先巴塞嘅10分優勢大幅收窄至6分，但小弟又唔擔心佢哋會一蹶不振喎，事關班波本身鬥心強，今晚喺西甲返主場鬥作客冇鬼用嘅皇家蘇斯達，誓以大屠殺嚟重振軍心，「-2」都照捧1.97倍「讓主」！（now632台周日凌晨3:00直播）


皇馬近兩場無啦啦將10分領先優勢嘔番4分出嚟，成隊波即刻騰晒雞，梗係啦，依家雖則仲領先6分，但大家都心知嚟緊「銀河艦隊」作客魯營嘅勝算幾乎等於零，保守啲睇可能只係領先3分咁大把，一有咩差池真係會畀近排態勇嘅巴塞反超前奪冠o架，今場梗係學拜仁咁去到盡攞番個勢先啦！何況會長皮里茲話隊波同埋球迷「永遠唔會放棄」，老細開到聲，班球員又點敢繼續頹先？

C朗好勝 皇蘇作客發軟蹄

「銀河艦隊」上場賽和維拉利爾其實已經賺咗，事關球證走漏咗兩個「黃色潛艇」應得嘅12碼，皇馬將帥仲喺度賴球證玩針對，其實都係因為落唔到台啫！小弟相信功力深厚嘅莫連奴今場即使坐波監，冇得親自落場督師，仍然會喺背後「做嘢」確保球隊做番齣好戲。


就算沙治奧拉莫斯、奧斯爾同埋比比都要停賽，回歸巴拿貝嘅皇馬仍然可以靠超班實力狂數皇蘇洩憤！加上一心衞冕西甲神射手嘅C朗，近排入球數畀美斯追過，出名唔衰得嘅佢實會入多幾球保面子。皇家蘇斯達作客唔掂，近7場輸足6場，連對CF格蘭納達同馬略卡都要大敗收場，今場都係輸少當贏啦！