巴塞碌「卡」食大茶飯

猪拉多纳

24/03/2012
文： 走肖

新世紀球王美斯傳射都掂，佢唔止以234球成為巴塞史上No.1射手，現時更加係西甲神射手同助攻王，撞啱「地上最強」因為傷停問題防線甩皮甩骨，只能夠以攻代守，馬略卡今晚喺西甲主場對巴塞，入球騷睇怕開硬，1.45倍入球大熱都要追。（now632台周日凌晨1:00直播）

馬略卡冇包袱唔似會死守

24歲嘅美斯已經係巴塞殿堂級球王，今季聯賽入34球，反壓C朗喺射手榜領先，同時亦以22次助攻獨領群雄，再者連續3次對馬略卡都有波入，包括首循環大演帽子戲法帶挈巴塞淨勝5球，正式係「馬略卡剋星」。


由於左閘艾比度準備換肝、中堅方達斯養緊傷、丹尼爾停賽，替補左後衞艾迪安奴又傷埋，現時巴塞得番佩奧爾、碧基同馬斯真蘭奴「兩個半」後衞，唔以攻代守點掂？主場嘅馬略卡連盃賽近10場得兩次保持清白，想話博和都唔易。更何況位列中游嘅佢哋根本冇包袱，與其喺主場玩死守悶球迷，不如對攻博多幾下掌聲好過，近6次對賽又開4次大一於再追！