愛斯賓奴上盤益大「加」

猪拉多纳

25/03/2012
文： 郭球奇


近5次主場對賽W晒格食格

近排西甲愈踢愈激，除咗爭榜首嘅皇馬巴塞鬥得燦爛，爭做「四哥」攞下屆歐聯入場券都好緊湊，今晚愛斯賓奴主場對馬拉加更加係關鍵一戰，愛斯賓奴近期喺菲臘比古天奴呢位國米借將帶動之下，成隊波踢到曉飛咁滯，兼且近年主場恰慣馬拉加，小讓平半上盤值得秤先！（now632台周日晚10:00直播）

愛斯賓奴 Vs 馬拉加

今季西甲中游亂到七彩，家陣第4嘅利雲特同第10位嘅華歷簡奴只相差7分，今晚愛斯賓奴同馬拉加呢對主角，分別排第6同第5相差4分，可以想像呢場6分波對「四哥」席位之爭有幾大影響。

馬拉加作客差唔齊腳

之前態沉到5場不勝嘅愛斯賓奴，近期重用季中由國米借嚟嘅中場菲臘比古天奴，成班波即時生晒，喺主場連贏華歷簡奴同桑坦德，上輪作客亦逼和貝迪斯1:1保住1分，菲臘比古天奴喺呢3場賽事總共射入3球，預計愛斯賓奴今戰繼續憑呢位巴西新星嘅活力帶動，就算有中場赫達摩蘭奴停賽問題亦唔大。


對家馬拉加今季大事擴軍，但到目前為止整體表現都唔算太標青，特別係作客成績更加麻麻。睇番往績，馬拉加今季離開主場只係贏過3場咁大把，近8場作客全部有失波，對上5次作客愛斯賓奴更加錄得全敗，擺明畀愛斯賓奴個格食住。而且前鋒雲尼斯達萊暗示今季尾可能退休，中場巴迪斯達同杜拿蘭又未傷愈，要喺近期回勇嘅愛斯賓奴主場攞分走，唔係講咁容易囉！

馬拉加近5次作客「賓奴」全敗

10/11/07 客負 0:1

09/09/23 客負 1:2

09/05/31 客負 0:3

06/01/29 客負 1:3

04/09/26 客負 0:1