紅魔上齊架生圍剿富咸

猪拉多纳

26/03/2012
文： 走肖

孫子有云：「三軍可奪氣、將軍可奪心。」曼聯今晚喺英超主場對富咸，士氣爆棚，因為領隊費格遜明白點樣喺爭標直路谷起戰意，不斷放風同球員續約加薪，再遇恰慣嘅富咸，有力開1.58倍「讓球主勝」。（有線200及300、廣東體育周二凌晨3:00直播）


今季曼聯冇咩大型收購，但依然能夠喺聯賽壓住狂燒錢嘅曼城、車路士同利物浦，證明費爵爺領軍功力出神入化。眼見紅魔爭標進入直路，近日費爵爺不斷發功谷士氣，先氹掂傑斯踢多1年，跟手又同史高斯延長1年合約。據講，連最近上位嘅中場保羅普巴都拒絕轉投祖雲達斯，決定續約留隊等發圍。

伊雲斯新約周薪80萬

咁都唔止，原本只係做後備嘅門將連迪加特，相信周薪會上升至4萬鎊。至於被曼聯球迷嫌棄嘅中堅莊尼伊雲斯，新約周薪更高達6.5萬鎊（約80萬港元），好多人恨都恨唔到。上周曼聯作客狂勝狼隊5:0，莊尼伊雲斯踢出身價波，入選上周英超最佳陣容，加上王牌射手朗尼弗爆，另一箭頭查維亞靴南迪斯腳風又順番晒，大炒對手唔難。


富咸普格恩耶克跌Watt


對家富咸由祖爾執教後，隊形明顯改善，戰鬥力亦有所回升。可惜，富咸近8次作客奧脫福球場全敗，可以話係自動送分，而且新加盟嘅射手普格恩耶克開始畀對手睇通條路，對上兩場對阿士東維拉同史雲斯都冇波入，要知道曼聯爭緊聯賽冠軍，1分都不能少，依家連普格恩耶克都入唔到波，富咸仲邊有運行？

橫數千軍

 曼聯對賽贏慣

‧近8次主場對富咸全勝，近6次更至少淨勝2球。

‧對上7場6次開入球大。

 富咸作客腳軟

‧連盃賽近9場作客賽事，僅得1勝2和6負。

‧連續6場開入球單。