AC巴塞「大」廝殺

猪拉多纳

28/03/2012
文： 阿占

歐聯8強超級大戰爆發！巴塞隆拿同AC米蘭繼分組賽後再度碰頭，今晚首回合巴塞先作客聖西路，牌面當然秤先，不過睇番上兩次交手兩隊都咬得好緊，依家紅黑兵團仲使怕你？話之係「地上最強」呀，一於趁住主場同你鬥搶！呢場有伊巴謙莫域同美斯兩大射手在陣，想唔開1.68倍入球大都幾難喇！（有線61、64、201及204、中央5台周四凌晨2:45直播）


美斯喺16強對利華古遜時，創出一場入5球嘅驚人紀錄；伊巴謙莫域上圈淘汰阿仙奴亦盡顯傳射功架，今場再次倒戈舊主巴塞，自然加多兩錢肉緊施展渾身解數，要呢兩位天王級前鋒唔入波真係好難。

分組賽交手AC唔輸蝕

小弟發覺唔少球隊對住巴塞，都有種「未踢先驚」嘅心態，於是落到場一味靠縮靠守。不過，AC似乎就冇呢個問題，分組賽兩鬥巴塞雖然1和1輸，但作客魯營仲可以逼和2:2，主場亦只係僅輸2:3！依家唔單止球迷，連球員都信自己有力同巴塞一戰，個老將龍門艾比亞迪直頭話，今場只係佢同美斯嘅決戰喎。

巴塞中堅碧基唔穩陣

睇番巴塞依家個勢，教練哥迪奧拿一早講明會以歐聯冠軍為今季最大目標。事實上以佢哋「地上最強」嘅攻擊力，被視為冠軍熱門係理所當然。但巴塞後防都有隱憂，中堅碧基近期狀態大跌，唔少失波都關佢事，今晚作客唔係一定贏硬o架，不過後防唔穩就啱晒開入球大啦！


頂占筍盤：AC米蘭（入球大）


有線球彩台主持阿占

電郵：soccer64@cabletv.com.hk&#8195HONE波熱線：1831 678 「球彩俱樂部」開放時間：周三晚10:30至11:45

橫數千軍

AC歐聯近績差

‧近15場歐聯僅4勝。

‧伊巴謙莫域近6場歐聯取得5球及3次助攻。

巴塞近5次交手不敗

‧近5次交手不敗，獲3勝2和。

‧美斯近25場歐聯射入30球。

賽制：採主客兩回合淘汰制，今輪為8強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。