低潮已過 皇馬夠贏奧沙

猪拉多纳

31/03/2012
文： 山度士

最近皇馬嘅葡萄牙左閘法比奧干查奧麻煩多多，原因係佢被拍到在養傷期間煲煙，之後仲話自己係完美嘅職業球員，此言一出，惹來傳媒口誅筆伐，鬧爆佢不知悔改。大家都知我踢波個陣經常受傷，最大劑嗰次係傷咗十字韌帶，原本以為做完手術會好番，點知一抖就抖咗兩年，最後要去荷蘭再做多次手術，先至徹底根治，唔使提早收山。


呢段漫長嘅養傷期非常難捱，頭半年要揸拐杖，為咗能夠踢番波，除咗要做適量運動Keep Fit外，仲要抵受佳餚美酒嘅誘惑，比冇病冇痛踢波時更加自律，呢個係作為職業球員應有嘅態度。今季馬些路踢得好，令法比奧干查奧冇咗個位，或會令金毛仔幾冇癮，不過咁都唔構成自暴自棄嘅理由。今晚皇馬作客奧沙辛拿，雖然主隊表現硬淨，但皇馬上下經歷小低潮後，預計小勝冇難度。


（now 632周日凌晨２時直播）