皇馬擸齊架生炒奧沙

猪拉多纳

31/03/2012

皇馬同巴塞今晚前後腳登場，雖然呢兩支班霸啱啱喺周中作客踢歐聯8強首回合，不過兩軍兵源充足，而且西甲鬥到入直路，皇馬同巴塞唔單止要搶分，C朗同美斯仲爭緊神射手添！既然兩大核心都搏老命，今晚佢哋分頭出擊，睇怕奧沙辛拿同畢爾包都係凶多吉少喇！


賽前喺西甲領先巴塞6分嘅皇馬，雖然周中作客去完塞浦路斯，今晚西甲又要作客奧沙辛拿，但「亨利」完全唔擔心佢哋會走樣囉！（now632台及廣東體育周日凌晨2:00直播）


點解？雖然奧沙辛拿喺西甲排第6，話就話同皇馬只差5位，但睇番積分差成32分，唔使「亨利」講，大家都清楚兩隊根本唔同級數，就算奧沙有主場之利，睇怕都好難佔到咩着數。

馬些路卡卡復任正選

同時，皇馬教練莫連奴其實喺歐聯「留咗一手」，大家睇番對尼科西亞嗰場歐聯嘅陣容，皇馬當時係用咗紐尼沙軒、法比奧干查奧等打正選，將馬些路同卡卡放喺後備，希古恩亦只係踢咗60分鐘多啲，莫帥咁做，目的就係想呢班愛將今場回歸正選搏命，儲定Power今晚炒奧沙！


冇錯，皇馬嚟緊周中又要再鬥尼科西亞，但佢哋依家揸住3粒作客入球，今晚根本唔需要作保留。咪忘記巴塞追吓近啲、追吓近啲，為免夜長夢多，皇馬鬥心肯定爆棚，1.88倍「讓球客勝」要捧場！

奧沙辛拿 Vs 皇家馬德里

奧沙失波前10最多

‧近4次主場出戰取得3勝，當中更曾擊敗巴塞。

‧暫時共失41球，為西甲前10位中最多。

皇馬近10戰轟28粒

‧連歐聯在內，近10戰錄得7勝3和，勁入28球。

‧近4次對奧沙辛拿獲3勝1和，首循環主場大炒對手7:1。