國米圍剿熱拿亞

猪拉多纳

01/04/2012
文： Katie

摔角界年度盛事Wrestle Mania（WM）聽日殺到埋身，美國長大嘅Katie自細睇摔角送飯，唔經唔覺都睇咗十幾年，今次大戰又點會錯過吖！好多人都話摔角暴力，偏偏小妹每次睇都覺得好有親切感，事關摔角只係一場戲，就住揪當然冇咁傷，今次WM除咗有「蠍子王」The Rock回歸之外，就連47歲嘅The Undertaker都會落場，呢一行真係襟撈！


球壇同摔壇相反，係長江後浪推前浪，上季保亞斯教到波圖曉飛然後過檔車路士，家陣就輪到「新保亞斯」施特拉馬斯安尼上位！呢位36歲國際米蘭看守教頭仲後生過隊長辛尼迪，你話得唔得人驚？咪睇佢年紀輕輕，查實不知幾識撈，一上任就話每位球員都機會平等，個個都有機會擔正，卒之首課操練成班球員虎虎生威，連意大利傳媒都話罕見。


當中莫路沙拉迪最世界仔，日前已經透過Twitter話無論上陣90分鐘定抑或9分鐘，都必定全力以赴博重返正選。先唔理沙拉迪係咪想做擦鞋仔，但施特拉馬斯安尼一揸旗就搞到陣營士氣高漲，人人都想取悅佢，今晚呢位少帥首演，主場對住熱拿亞唔似會失威。

熱拿亞防守弱8戰不勝

冇錯！國米呢排係頹，但對手熱拿亞仲濕滯，已經連續8場聯賽未贏過。年頭加盟嘅基拿甸奴至今亦只係入得1球，而且佢哋迄今勁失51個聯賽入球，係全意甲防守力至弱雞嗰隊，睇個款似係會畀國米祭旗，輸鑊勁絕對唔奇，2.4倍「讓主」值博！（開賽時間：周日晚9：00）

Katie推介：國際米蘭（讓球主勝）

外國長大，半個鬼妹仔，自細因爸爸成日帶朋友返屋企睇波而愛上足球，鍾意睇靚仔但唔會盲目追捧，最緊要係好波。

微博傳情 \(^O^)/

「大眾踩單車郊野上……」呢排天氣涼涼哋，最啱係去郊外做吓運動！最近Katie斥巨資買咗架單車，喪踩咗兩個禮拜後足足減咗5磅，Unbelievable！以前小妹好抗拒踩單車，一來擔心會變「甲組腳」，二來睇見啲MK仔裝晒喇叭喺架車度大大聲播歌真係好反感！

之但係Katie依家識玩嘞，日頭由沙田踩入大埔，途經科學園可以坐低食嘢抖一抖；深夜吹住涼風「踩街」，又可以靜靜哋諗吓嘢Relax！小妹順便喺度同大家分享一單瘀事，話說小妹試過跟一班單車達人踩山路，唔單止唔夠力上斜，途中仲畀狗追到翻車，奉勸各位技藝未精嘅朋友，都係量力而為。><