歐霸盃8強次回合玩細有So！

猪拉多纳

02/04/2012


大家好，我叫「阿潮」，老友「阿水」因有要事離港（大家放心，佢唔係着草），佢臨走前交帶落要我幫手睇水，我幾唔得閒都要撐一撐佢！

「阿潮」絕對係毒男，偶然會喺社交網站識吓女仔或者同朋友吹水，但大部分時間都係開住個波網嚟買波，嚴格啲講呢，賭到有啲病態嘞！不過，畀網我玩嘅老死就話，叫我點輸都唔好Cut，因為一唔賭就唔知啲運幾時返嚟喎。


大盤客係時候獲利回吐


「阿潮」梗係唔信呢種講法，追問之下，個老死先爆畀我知，原來經佢畀出去嘅網，佢都會食番2成，即係做20％莊，為咗唔想有太大風險，佢都會花時間去研究吓每個「客仔」嘅賭性，盡量平衡番上、下盤客同大、細盤客嘅注碼，咁樣雖難贏到大錢，但起碼無咁易賴嘢。聽完後我都打個突，撈艇、撈莊原來咁有學問，風險錢一啲都唔易賺！

老友仲話，上星期四場歐霸盃8強首回合全大，佢幾個大盤客索到索索聲，相反班細盤客就嗌晒救命。不過，呢個星期嘅次回合，好大機會到細盤客威番次，我問點解，老友話佢班大盤客威咗好多個星期，係時候獲利回吐喇！