拜仁對攻玩舖大

猪拉多纳

03/04/2012
文： 蘇斯黑柴

歐聯八強次回合拜仁主場於安聯球場迎戰馬賽，拜仁首回合作客先贏二比○，今仗更有主場之利，出線基本上冇乜懸念。賽前雙方陣營消息正面，尤其馬賽聲言唔會放棄，亦要為尊嚴而戰。雙方在壓力不大下極有機會合演一場對攻好戲，黑柴認為入球大可作過關重心。


（有線62及202台周三凌晨2時45分直播）


拜仁近期喜訊頻傳，當中最高興莫過於德甲爭標對手多蒙特上輪失分，目前拜仁只落後多蒙特三分，重奪聯賽錦標希望大增，加上魔翼洛賓亦決定同球會續約至2015年，對球隊士氣起到正面作用。


拜仁首回合有兩球領先優勢，但球隊向來攻優於守，而且極重氣勢，今仗主場出擊當然唔會主守，亦希望以強勢殺入四強，為下周中對多蒙特的聯賽關鍵戰造勢。何況該隊本周末聯賽繼續於主場出戰弱旅奧格斯堡，接連主場作戰加上未來對手實力非強，拜仁冇留力必要，今仗會繼續強陣力爭佳績，確保穩入四強。

柏賓激勵馬賽奮力一搏

馬賽今季表現令人失望，教練迪甘斯已聞到魷魚香，不過佢賽前聲言唔會放棄，佢認為馬賽首回合對拜仁上半場表現絕對唔應該先失，今仗只要能夠於上半場取得入球，一切都未絕望。馬賽名宿柏賓賽前亦激勵球隊，佢話馬賽已經多年未有在歐聯舞台亮相，基於今屆聯賽成績欠佳，下季亦無緣踢歐聯，球員更應該珍惜今晚最後表演機會。


既然外界已認定拜仁將會打入四強，馬賽於冇嘢輸嘅情況下應該放手一搏，首席射手雷米傷愈後逐步回復佳態，於首回合對拜仁亦有優異演出，今晚肯定係馬賽寄望創造奇迹嘅重要籌碼。

馬賽於聯賽已無欲無求，今仗即使機會渺茫亦要焗攻，佢哋曾於分組賽作客對多蒙特攻入三球，既然今場○比○戰果對馬賽全無意義，勢必於上半場謀求主動，正合不擅破密集嘅拜仁胃口，呢場對攻戰入球大賠率雖熱，卻係最穩陣投X取向。

刺客