車仔雙殺賓菲加

猪拉多纳

04/04/2012
文： 巨高

王子歸位，車仔霸氣外露！英超勁旅車路士自換上迪馬堤奧領軍後，除戰績突飛猛進外，連之前冇晒信心嘅「西班牙王子」費蘭度托利斯，亦重拾久違射手觸覺，入球、助攻不絕。周四凌晨歐聯八強次回合，車仔於史丹福橋球場擺擂台迎戰賓菲加，以「藍戰士」現今氣勢，有力繼首回合作客贏一比○後雙殺對手，揀主W！（有線61及201台周四凌晨2時45分直播）


車路士同意大利籍教頭八字似乎幾夾，前季「肥安」安察洛堤為球會贏得社區盾、英超及足總盃冠軍；依家看守領隊迪馬堤奧上任後，八場比賽獲六勝一和一負佳績，包括兩場歐聯力克拿玻里及賓菲加兩大強敵。正所謂人夾人緣，任你班底幾咁出類拔萃，如果同管理人唔夾，到頭來只會事倍功半，做乜都唔順。

迪帥揸車好腳頭

前任車仔領隊保亞斯及現任看守領隊迪馬堤奧，就係活生生例子，保亞斯之前幾努力都好，球員就係睇佢唔順眼，試問一個犯眾憎領隊，又點能夠帶領球隊爭取到好成績。相反迪馬堤奧係紅褲子出身，球員生涯光輝時代更於車路士度過，深明與「車手」溝通之道，士氣好自然成績好。連「廢托」都畀迪帥撻番着變「王子」，就知道之前保亞斯根本喺度蹉跎歲月。

賓菲加近排搏殘

賓菲加有實力，但近期喺葡超及葡聯盃連番激戰，繼兩鬥波圖後，上仗於聯賽爭標大戰亦同布拉加鍊得好盡，雖然最終險勝對手，但體力消耗之巨實不在話下。況且車路士今屆歐聯主場全勝兼起碼贏對手兩粒，賓菲加首回合主場都輸，今仗作客好難偷雞。