車仔賓菲加「大」廝殺

猪拉多纳

04/04/2012
文： 阿占

歐聯8強次回合今晚爆發，首回合作客領先1球嘅車路士，今晚返史丹福橋球場迎戰賓菲加。按形勢車仔晉級機會的確好大，不過今屆歐聯興玩「絕地反擊」，所以呢場勝負唔易捉摸，唯一肯定嘅係兩隊都有強大鋒力，捧1.85倍入球大最有保證。（有線61、64、201及204、中央5台周四凌晨2：45直播）

車仔費托復甦唔會死守

車路士改由迪馬堤奧接手後，成隊波士氣提升唔少，費蘭度托利斯復甦亦係有目共睹，雖然「王子」入球率仍然唔高，但佢嘅卡士仲喺度，因為今季佢喺各項賽事已經交出雙位數字助攻，做咗「助攻王」。佢嘅強大牽制力，往往為林柏特同桑馬達等後上殺手製造機會。


查實依家車仔最大本錢就係進攻，唔單止費托翻生，杜奧巴同史杜列治，甚至沙洛文卡勞都有貨交，就連大衞雷斯同泰利兩大中堅都頻有斬獲。大家如果以為車仔今場會死守1：0優勢就誤會晒喇，你睇番佢哋今屆歐聯4次主場已經入咗13球，迪馬堤奧會唔會咁傻仔放棄唔攻呀？

賓菲加激戰紅魔照鬥攻

首回合輸波嘅賓菲加今場就無得諗o架喇，今晚除咗狂攻博一鋪之外別無選擇。事實上佢哋手上亦有奧斯卡卡度素、奧斯華度加坦同沙維奧拿等一流前鋒，要踢進攻足球絕對唔係難事，之前佢哋喺分組賽作客激戰曼聯，就曾經同紅魔打成2：2，今場要同另一隊英超勁旅車仔死過，入球肯定唔會少啦！


首回合：車客勝1：0


頂占筍盤：車路士（入球大）

橫數千軍

車仔今屆歐聯主場勁

‧今屆4場主場歐聯賽事全部獲勝，攻入13球並只失1球。

‧近9場主場歐聯只係輸過1次（上屆8強對曼聯落敗）。

賓菲加訪英戰績差

‧今屆6場歐聯作客賽事得2勝3和1負。

‧近13次作客英格蘭球隊得3勝1和9負。

有線球彩台主持阿占

電郵：soccer64@cabletv.com.hk

PHONE波熱線：1831 678

「球彩俱樂部」開放時間：周三晚10：30至11：45

賽果熱線：2707 9900

周三晚8時20分起至周四晚6時止