皇馬「-2」照炒尼科西亞

猪拉多纳

04/04/2012
文： 力奇

皇馬火爆三箭頭C朗、賓施馬同希古恩今季喺各項賽事夾埋入咗99球，今晚呢個鐵三角雖然缺少咗賓施馬，但喺歐聯8強次回合主場對塞浦路斯嘅尼科西亞，都好大機會將總入球數突破3位數字機會。「銀河艦隊」首回合即使揸住3球喺手，相信都唔難再大炒一場，「-2」都要捧1.61倍「讓球主勝」。（有線62及202周四凌晨2：45直播）


首回合憑住射手賓施馬梅開二度，再加上中場卡卡入波，皇馬以3：0大勝，今仗返番主場，雖則話行住嚟踢都好難會出事，但話晒「銀河艦隊」近排先啱啱重返正軌取得3連勝，主帥莫連奴點會咁蠢，打窒番自己班波道氣？

進攻鐵三角挑戰百球大關

況且，皇馬一班進攻球員今季都係好似唔識收，聯賽30場入咗100球，平均每仗射入3球有多；喺歐聯則係9戰入27球，平均又係每仗入3球，火力實在驚人。值得一提，當中火爆三箭頭嘅C朗就喺各項賽事射入咗47粒，賓施馬係28球，希古恩則係24球，夾埋入咗99粒，是但出一件都足以玩死尼科西亞。

C朗續擔正火力唔成疑問

人腳方面，皇馬為留力周末對華倫西亞嘅西甲大戰，盛傳會收起5件主力，今仗波監刑滿嘅中場大腦沙比阿朗素只會打後備，射手賓施馬、中場奧斯爾、左、右二閘馬些路同艾比路亞都會被收起，不過最緊要係入球停不了嘅基斯坦奴朗拿度會繼續在陣，希古恩會取代賓施馬出任正箭頭，首回合有上佳演出嘅中場紐尼沙軒則會擔正，火力完全唔使擔心。


「神奇球隊」尼科西亞呢邊，之前最叻都只係搞掂波圖同埋里昂，之後喺8強首


回合主場對住皇馬即時現形不再神奇，仲可以點樣？最慘係佢哋兩大主力中場馬些路奧利華拉同積高夫斯基都齊齊因傷缺陣，嚟到巴拿貝咪當係觀光囉！

首回合：皇客勝3：0

橫數千軍

皇馬9成9過關

‧28次踢歐聯8強22次晉級。

‧歷來27次歐戰首回合作客領先，有26次晉級。

尼科西亞征西冇運行

‧11次遇西班牙兵得5和6負。

‧近25次歐洲賽場作客得7勝9和9負。