捧維拉最正路

猪拉多纳

07/04/2012
文： 麥馬拿仁

哀兵紅軍內憂外患嚴重，家陣簡直瓣瓣都唔掂，喺英超毫無惡氣，如此衰波又點可以唔反？利物浦近7場聯賽輸咗6場，走勢前所未有地曳，今晚主場鬥阿士東維拉，唔單止有門將連拿坐波監，丹尼爾艾格、格連莊臣等又缺陣，維拉輸輸吓已經陷入降班危機，搏老命下受讓捧「讓球客勝」！


（有線300及200台周六晚10時直播）

主勝1.3倍唔合理

利物浦贏咗聯賽盃，穩奪來屆歐霸盃資格，士氣理應更上一層樓；但英超主場不敵阿仙奴，球隊落後前四愈來愈遠，之後竟然愈踢愈曳，班球員連走多步都唔願，領前兩粒可以反輸畀昆士柏流浪，主場對韋根亦全失3分，上仗敗予紐卡素，安祖卡路爾更向領隊杜格利殊爆粗。球員一係躁爆，一係頭耷耷冇晒心機，杜帥見到都冇晒計。


另外，鋼門連拿上仗領紅，今場開始要坐3仗波監，後備門將杜尼已經雪到硬，落到場分分鐘出醜，加上加歷查狀態大不如前，謝拉特亦獨力難支，今戰主W竟然熱到1.3倍，簡直係離晒大譜。

唔想護級全力搶分

維拉隊長柏杜夫被驗出身罹絕症，球隊上下都希望為佢而戰，上仗鬥復甦車路士輸2比4，球隊表現唔錯，可謂雖敗不辱。今仗雖仍有戴倫賓特、尼索比亞等缺陣，但球隊離安全線只有5分距離，必定搏命搶分，受讓之下，揀維拉「讓球客勝」好路。