冇羅斯仔 潛艇一樣唔使輸

猪拉多纳

07/04/2012
文： 山度士

「黃色潛艇」維拉利爾今季真係多災多難，以為有歐聯踢好筍，點知先有中場發電機辛迪卡索拉改投「暴發戶」馬拉加，冇耐意大利射手基奧斯比羅斯重創長抖，結果黃色潛艇不堪重負，搞到3條戰線全部仆直，由前4列強變為護級球隊。其中基奧斯比羅斯嘅受傷打擊最大，雖然羅斯仔轉會傳聞不絕，但維拉利爾為打好歐聯，拒絕各路重金邀請，最終歐聯全敗出局，羅斯仔重傷，依家想賣都未必賣到好價錢。


有傳羅斯仔今個月可復出，並積極操練，希望趕及參加歐國盃。上周度士講過當年去咗荷蘭做手術，之後一返香港即投入球隊訓練，其實醫生叫過我至少要休息一個禮拜，好彩冇搞到舊患復發。度士好明白羅斯仔急於復出嘅心情，但如果為咗一項大賽而賠上自己整個職業生涯，咁就唔抵喇！況且維拉利爾已經習慣「沒有羅斯的日子」，今輪作客打緊風流波嘅貝迪斯，預計黃色潛艇今仗可不敗而回。（now 632周日凌晨4時直播）