曼城迷失仙境

猪拉多纳

08/04/2012
文： 蘇豪

英超是日重頭戲由阿仙奴主場鬥曼城，曼城狀態全面回落，而且遲遲未能解決作客腳軟問題，客場火力非常疲弱，嚴重影響奪標機會，今次作客「兵工廠」勢將再次陷入苦戰，平手盤捧阿仙奴！（有線300、200及204台周日晚11時直播）

曼城季初踢到曉飛，不但主場贏到開巷，連作客都好叻仔，先後大炒勁敵熱刺及曼聯，演出極具霸氣。當高峰過後，曼城再次暴露作客弱點，近九場作客聯賽只贏兩場，對手只係韋根同阿士東維拉等次級對手，九戰加埋只入五球，火力極弱。曼城上次聯賽作客中游球隊史篤城，踢到尾段先憑耶耶托尼士哥逼和對手，全場踢來未見優勢，唔輸已經偷笑，真係好唔掂！


阿仙奴主場惡


曼城雖然擁有大批天王巨星，但始終欠缺團隊精神，「腦殘」巴洛迪利同隊友關係惡劣，仍獲主帥文仙尼力撐，令更衣室氣氛好曳。曼城近期踢落愈來愈唔對辦，上次主場對新特蘭一度落後一比三，最終由巴洛迪利及高拉洛夫尾段兩次射門建功逼和對手，由於中場指揮官大衞施華態沉，球隊進攻無甚組織，冇乜入波板斧，即使射手阿古路傷愈復出，亦難扭轉頹勢。

阿仙奴上場作客爆冷不敵昆士柏流浪，發揮確實麻麻，不過大軍最近喺主場惡到出汁，對上六次主場出戰全勝，合共轟入廿三球，先後大炒熱刺及AC米蘭等強手，曼城近期作客只得英超中游球隊水準，要作客酋長球場搶分並非易事。近期紐卡素同車路士來勢洶洶，「兵工廠」要搶分力保前四位置。曼城都想贏波保住爭冠機會，但球隊近期明顯有心無力，難望搶分！


曼城暴發後對阿仙奴戰績


球季 賽事 賽果
11/12 英超 主勝1:0

英聯盃 客勝1:0

10/11 英超 客和0:0

英超 主負0:3

球季 賽事 賽果

09/10 英超 客和0:0

英聯盃 主勝3:0

英超 主勝4:2

08/09 英超 客負0:2

英超 主勝3:0