紅魔細筍過Ｗ

猪拉多纳

08/04/2012
文： 蘇豪

英超一哥曼聯今輪於主場迎戰護級份子昆士柏流浪，「紅魔鬼」近十一場聯賽十勝一和，霸氣迫人，不過，隨住復活節快車期展開，球隊只求三分，冇必要大炒對手，今場大細中位數改成3.5球，捧細啦！
（有線300及200台周日晚8時30分直播）

曼聯去到爭標最後關頭着晒火，近十一戰只失兩分，對上四場贏波兼保持不失，愈踢愈穩。「紅魔鬼」最恐怖之處係踢得唔好都照贏，前仗主場小勝富咸打得曳，上場作客險勝布力般流浪發揮亦唔好，不過，呢種正正係王者應有表現，曼聯球星於關鍵時刻輪住發功，真係贏在心理質素好，呢點曼城恨都恨唔到。


硬仗多點到即止


曼聯快翼拿尼傷愈可候命，右翼路爾斯華倫西亞弗到爆炸，加埋艾舒利楊格，側擊力有保證。另外，「紅魔鬼」主帥費格遜老謀深算，擅於留放，係球隊季尾撻著重要原因，大軍嚟緊周中仲要作客韋根，對手近期急於護級如狼似虎，絕對唔易應付，今場老費實會叫班球員點到即止，贏波就得，冇必要太搏。

昆士柏流浪近期接連擊敗利物浦同阿仙奴，但兩場都係主場出戰，大軍對上九場作客賽事未贏過，今次造訪奧脫福球場唔會咁大想頭，都係會主守。昆士柏流浪射手施斯繼續坐波監，箭頭希古臣及杜迪利甘保傷愈踢得，但級數始終唔算高，今場輸少當贏，預計曼聯唔會大炒對手，可博細盤