倫敦打吡撐富咸

猪拉多纳

09/04/2012

復活節快車嚟喇！嚟緊幾日，歐洲聯賽大放送，睇吓邊個貼得中。今日先有英超、英冠同英甲快車，即時由蘇豪為你啟動英超三場爭歐聯入場券嘅大戰！車路士進入四月「魔鬼賽程」第三站，今仗係倫敦打吡戰作客富咸，六日內第三度登場！職業球員都係血肉之軀，唔係機械人，佢哋都會攰，車仔今次疲兵客場出擊，贏波難度極高，一於博富咸「讓球主勝」！（有線300及200台周二凌晨3時直播）


車路士趕走麻煩主帥保亞斯，改由迪馬堤奧領軍確係好咗，球隊放棄迂迴組織，踢法簡單直接，有番多少當年莫連奴領軍時嘅味道。車仔能夠起死回生，蘇豪始終唔認為係迪帥功勞，其實以佢哋班球員嘅經驗同質素，即使呢架藍戰車無人駕駛，仍能踢出現時嘅水準，只要迪帥唔好多事管住晒，班兵就可自動波交出水準。

車路士或留力足總盃

車路士踏入四月面對「魔鬼賽程」，近六日內踢三場波，普通街波就話冇乜所謂，但佢哋近期場場都要搏，非常難頂！車仔陣中多老鬼，林柏特、泰利同A高等老將上仗齊齊休戰養傷，無論迪馬堤奧點輪換，骨幹成員都要頂硬上，唔攰至奇！另外，球隊下仗就要於足總盃四強硬撼熱刺，就算唔留力，疲兵再戰都係擇使。


睇番車仔前晚贏韋根二比一，又有問題入球，兼要靠補時入波至有得贏，已經好危險，激到韋根鬧車仔係來硬搶走三分，有冇得再搶？咁易咩！


富咸護級壓力唔大，上岸只係時間問題，依家可大踢風流波，對於車仔嚟講，面對呢類球隊充滿危機。富咸本身都係倫敦球會，時時刻刻都想打低倫敦大佬車路士，今季佢哋專同倫敦球會作對，只係輸過畀熱刺一次，大軍中前場球員丹普西、杜夫同普格恩耶克等都有分量，大有條件煞「車」，主場受讓可秤先！

富咸今季對倫敦球會戰績

日期 戰果

25/02/2012 客勝昆士柏流浪1:0

03/01/2012 主勝阿仙奴2:1

26/12/2011 客和車路士1:1

27/11/2011 客和阿仙奴1:1

07/11/2011 主負熱刺1:3

02/10/2011 主勝昆士柏流浪6:0

22/09/2011 客和車路士*0:0

*為聯賽盃，其餘為聯賽