甩轆車仔鬥富咸 焗打守「細」波

猪拉多纳

09/04/2012
文： 走肖

車路士今季可能攞唔到下屆歐聯席位，證明有錢唔係大晒，最近英國傳媒計數，發現今季車仔每拎1分嘅積分成本要134萬鎊（約1,650萬港元），零件老化入波唔多係致命傷，今晚呢隊「嘥錢王」喺英超倫敦打吡作客富咸，殘陣應戰想攻都有心無力，玩1.85倍入球細好過。（有線200及300、廣東體育周二凌晨3：00直播）


雖然迪馬堤奧接替保亞斯領軍後，車仔的確有起色，至少暫時冇再傳出內部不和，但唔好忘記，依家車仔仲有好多傷兵，中場林柏特、拉美利斯同左閘艾殊利高爾日前對韋根已經缺陣，今場都未必踢得，隊長泰利斷肋骨更加唔使預佢，即使想攻都冇子彈，副偈隨時攤番凍迫住要踢得更保守。

倫敦打吡祖爾守得住

由於杜奧巴對韋根打正選，正常呢場輪到費蘭度托利斯擔正，雖然佢近排似番個前鋒識入波，但距離真正復活仲差好遠。英國網站Talksport統計過，假如以上年暑假至今個冬季嘅轉會費淨投入計算，車仔最嘥錢要134萬鎊至拎到1分，費托身價高踢得差係最大負累，點信得過佢？


黃金戰車慘變甩轆廢車，嗰邊富咸就贏番晒尊嚴，領隊祖爾今季領軍出戰「倫敦打吡戰」有晒交代，當中連盃賽4次對住車仔或者阿仙奴，拎到1勝2和1負，期間有3場開入球細，梗係唔會隨便投降，何況富咸射手普格恩耶克同隊長梅菲傷勢好轉，可以調動嘅人腳更多，既然唔赦車仔，頂得住開入球細唔奇喎！

橫數千軍

富咸連開9口單


‧對上5次主場對車路士獲2和3負。

‧連續9場開入球單。

藍戰士半場旺開和

‧近12場半場4次領先8次打和。

‧看守領隊迪馬堤奧上任後獲8勝1和1負。