布力般+1有利可圖

猪拉多纳

10/04/2012
文： 蘇豪

英超褪色勁旅利物浦於復活節快車期作客布力般流浪，「紅軍」個心早就飛咗去本周末對愛華頓場足總盃四強打吡戰，男人變咗心，好難返轉頭，懶理甚麼幾十年來最差走勢，球隊聯賽繼續Hea到底，作客讓波必反，強捧「讓球主勝」！（有線300及200台周三凌晨3時直播）


利物浦主帥杜格利殊知道球隊於聯賽冇得爭，早將矛頭指向盃賽，近期聯賽踢落完全唔對辦，連組織一個似樣啲嘅攻勢都唔掂，以佢哋本身人腳，點會踢得咁曳呀，佢哋只係想示人以弱，目的係搭靚個棚喺嚟緊嗰場足總盃搞掂死敵愛華頓。杜Sir早就話重視盃賽，已經做到出晒面，只係球迷一廂情願覺得佢哋仲會喺聯賽搏命。

足總盃先係紅軍杯茶

「紅軍」距離翻身打吡戰只差一場，當然要繼續連戲啦，既然之前都可以無恥地主場輸畀韋根，作客不敵布力般都好合理啫。大軍仲有唔少傷兵，右閘格連莊臣、中場查理阿當及盧卡斯等主力都唔踢得，聯賽冇嘢好爭，無謂搏殘兩大巨頭蘇亞雷斯同謝拉特，如果杜Sir識計數，今場理應繼續落柯打叫球員Hea踢，費事有人受傷影響部署。


布力般流浪三連敗後現排十八位再次陷入降班漩渦，計實力當然唔及「紅軍」，但論戰意肯定贏晒！大軍前仗主場對曼聯逼到對手氣咳，最終鬥到尾段先輸，今次對住冇牙老虎利物浦，絕對係搶分護級「金鑽餐士」。紅軍門神連拿坐波監，要用後備門將杜尼頂上，布力般可恰杜尼冇態，實行狂斬波埋龍門口死湧爛湧，入波非難事，受讓有計，進取博埋「讓球主勝」！