紅魔衝冠軍斬草除「根」

猪拉多纳

11/04/2012
文： 亨格比利

英超今晚繼續開快車，奪標形勢大好嘅曼聯會造訪韋根，主隊要搶分脫離降班漩渦，領隊馬天尼斯講明豁出去同紅魔鬼鬥攻，要知道雙方實力差天共地，韋根唔識死隨時輸得仲甘，曼聯冠軍在望點會手軟，一於捧1.92倍「讓球客勝」。（有線200及300、廣東體育周四凌晨2：45直播）


曼聯對賽最少贏2粒


曼聯家陣拋甩同市死敵曼城8分穩坐「一哥」位置，最近8場聯賽更係贏晒，今晚對住韋根呢味私房菜，睇怕又係「搵食良機」。睇番往績，雙方近5次交手都係曼聯贏，5場勝仗嘅贏波差距至少2球，擺明食住韋根。

韋根喪玩343仲易死

對家韋根揸住28分排尾二，最近搏老命搶分確係有啲起色，先後砌低利物浦同史篤城，上仗亦只係因為兩個越位波畀車路士屈死，賽後領隊馬天尼斯成肚火，公開批評球證執法不公之餘，仲同中場占士麥卡菲異口同聲話唔赦曼聯，今晚要豁出去鬥攻搶分喎！但講就容易，馬天尼斯呢排喪玩343，直情當右閘保斯係翼咁用，要知道呢排路爾斯華倫西亞同艾舒利楊格弗到漏，韋根唔識死鬥攻隨時輸鑊勁都似！

橫數千軍

韋根士哥英超包尾


‧英超鋒力至削，今季32戰僅入30球。

‧近10仗英超主場都未試過喺上半場入波。

紅魔聯賽5場不失

‧近5次鬥韋根贏晒，5場贏波球差至少2球。

‧連續5場聯賽保持清白之身。