曼城仲未斷氣搏老命

猪拉多纳

11/04/2012
文： 力奇

近排衰到貼地嘅曼城，今晚返到主場迎戰中游分子西布朗，為保爭標一線生機，根本唔容許有任何保留。好彩客軍基本上已接近護級成功，踢緊風流波，鬥志唔會太強，預計曼城唔難反彈大捷，1.67倍「讓球主勝」值得捧場。（有線201、301周四凌晨2：45直播）

藍月亮大衞施華復出

近5場聯賽僅得5分，曼城眨吓眼已經落後宿敵曼聯8分，由於聯賽只餘6輪，想追真係唔容易。當然，老細文梳亞落足本錢，就算家陣只餘數字上機會，球隊上下無論領隊文仙尼定班球員，都肯定要為下季飯碗而戰，試問點會唔搏命先？


冇錯，佢哋今仗會有巴洛迪利停賽，前線阿古路同迪施高都腳風麻麻，泰維斯又係狀態未足，不過今鋪對手只係中游嘅西布朗，以佢哋卡士，要入番2球都唔算貪心吖！何況曼城今晚仲有創造力超強嘅大衞施華復出，頂替養傷嘅耶耶托尼呢！


西布朗上仗贏布力般流浪叫做終止咗4場不勝走勢，但其實睇番聯賽榜，排緊13位嘅佢哋足足高過護級安全線11分，護級壓力唔大未必會搏。而且包括前鋒謝拉、中場謝路美湯馬士及占士摩利臣都話有傷唔踢得，呢個陣容不整嘅「閒人」今晚想輸少球都難啦！