祖記火力返晒嚟射爆拉素

猪拉多纳

11/04/2012
文： 查理阿蛋

祖雲達斯復興大業快將完成！今晚「斑馬軍團」坐鎮主場迎戰拉素，絕對有力延續歐洲5大聯賽唯一不敗之師嘅本色，一於捧1.98倍「讓球主勝」啦！（now633及660台周四凌晨2：45直播）

拉素教頭未踢先投降

啱啱重上榜首嘅祖雲達斯雖然聯賽未輸過，但係火力唔強一直為人詬病，好彩班波連和幾場後突然爆發，意甲4連勝兼勁入12球，更已連續5場聯賽不失，無論攻定守都可以話係冇得彈！就算正值復活節假期，「斑馬軍團」亦都繼續努力操練，對於爭冠，連續兩場都入波嘅中堅邦路斯勁有決心咁話：「依家一切都視乎我哋自己嘅表現啦！」小妹相信佢哋為咗重奪失落多年嘅意甲冠軍，一定會踩行油撞散拉素。


祖記呢邊就鬥志旺盛，反觀對手拉素就落晒形！雖然佢哋上場贏咗拿玻里，為保住歐聯席位大打強心針，但係睇番佢哋近6場作客只係贏過1場咁大把，而且場場都有失球，最慘係王牌射手高路斯仲養緊傷。教練利查早前接受訪問都話祖記主場「好得人驚」，未踢已經投晒降，想輸少過兩粒都難喇！