「瑞典超巴塞」主場惡 赫根有米路

猪拉多纳

12/04/2012
文： Combo King

今日阿King集中研究一場瑞典超赫根主場鬥米贊比。北歐波主要打硬淨，技術型球隊唔多；但咁啱今場兩支球隊都屬於技術型。赫根人腳、配合同默契都優於米軍，就好似巴塞對住阿仙奴一樣，加上赫根狀態大勇兼有主場之利，捧主W。（周五凌晨1時開賽）


辛斯華爾唔夠班


赫根擅長地面推進，踢法於瑞典超中算是悅目，故於當地極受球迷歡迎。上仗球隊面對勁旅馬模，攻擊手華維斯、馬干迪利及安基夫喺前線玩晒，搞到對手一戙都冇，結果大勝5比0，將攻擊足球哲學發揮到淋漓盡致。米贊比同赫根踢同一家波，但細佬遇上大佬必冇運行，上季去到赫根地頭就慘吞六蛋，今場失三分勢所難免。


另一場辛斯華爾主場鬥西里安斯卡，辛軍為升班球隊，開咧兩仗都輸0比1，明顯唔夠卡士。加上陣中大將科斯貝治上陣成疑，讓波當然捧對家。最後睇埋場荷甲迪加史卓普主場對烏德勒支，迪軍狀態曳但有主場之利，而烏軍則作客奇差，翻查往績近五次交手全數打和，咁嘅形勢下不妨再追和局。