車巴歐聯情仇

猪拉多纳

18/04/2012

04/05 16強 巴塞2：1/車路士4：2


焦土結怨


莫連奴挾助波圖捧歐聯威勢轉教車仔，繼續做好戲，尤其係次回合採取「焦土戰術」，故意整到史丹福橋球場草皮蓉蓉爛爛，大大阻礙巴塞地面推進踢法，果然奏效成功收復首回合失地，反勝晉級。巴塞極之不滿莫帥「陰招」，自此之後雙方成為死對頭。


05/06 16強 車路士1：2/巴塞1：1


莫帥失威


連續兩年喺歐聯十六強交手，巴塞今次學精咗，首回合作客史丹福橋球場唔怕莫連奴再出蠱惑，力挫車路士。次回合車仔喺補時一度由林柏特扳平，令比賽進入高潮，但為時已晚。巴塞不但成功報仇，更於決賽擊敗另一支倫敦球隊阿仙奴奪得冠軍。

06/07 分組賽 車路士1：0/巴塞2：2

魔獸科騷

兩隊唯一一次在分組賽交手，車仔主場憑「魔獸」杜奧巴一箭定江山勝出，呢位科特迪瓦射手作客魯營再做英雄，補時入波逼和巴塞二比二。車路士最後亦力壓巴塞，以小組首名出線，但四強止步，莫連奴始終未能為車仔捧歐聯。

08/09 4強 巴塞0：0/車路士1：1

球證玩車

車仔首回合互交白卷，次回合車路士主場九分鐘領先，其後巴塞更有後衞艾比度被逐，以為車仔晉級在望，但挪威球證奧維保多次判決對車仔不利，碧基犯手球亦冇罰巴塞極刑，最終巴塞憑恩尼斯達補時階段射入扳平一比一，憑作客入球戲劇性淘汰車仔。杜奧巴於完場後用粗口追罵球證，被重罰停賽六場，而巴塞就喺決賽擊敗曼聯捧盃。