開心指數泥地長勝

猪拉多纳

蔡明紹復出，師傅告東尼派強陣配合出擊，被視為全日擂台躉嘅「開心指數」，再一次大熱掄元，泥地1200米四戰四勝，成為新一代泥地王。「開心指數」今場前中段畀「綠色寶」拍住鬥燒，但依然可以力拒對手來犯，表現出色。不過，雖然下月中將會舉行全泥夜宴，但告東尼賽後就同馬主陳國民講定，「開心指數」或會轉爭草地短途賽，之後就提早休息，留番下季用。
       
開心指數四戰泥地千二米全勝，東廐師徒征澳門前壯行色。
蔡明紹(中)、告東尼(右下)

「開心指數」季內曾喺田草1200米放入第二，證明場地性能廣泛，陳國民話愛駒仲後生，雙線發展一樣無乜問題，不過佢話最緊要多謝老友郭少明，割愛轉讓呢匹馬畀佢，所以尋日「開心指數」贏馬，郭少明當然有份到凱旋門拉頭馬。