|
|
25/04/2012
皇馬同拜仁兩隊只能活一隊，但即使能夠過關，佢哋喺決賽都可能面對嚴重停賽問題，皆因兩隊目前夾埋有11個球員「孭牌」，只要今場再被黃牌警告，就會錯過慕尼黑終極之戰，搞到德國「凱撒大帝」碧根鮑華呼籲歐洲足協改革停賽制度，拜仁隊長拿姆甚至希望「德甲福星」球證關照手鬆啲。
拜仁守將多黃牌在身
現時拜仁有包括必然正選嘅隊長拿姆、中場湯馬士梅拿同卻奧斯，總共7個球員有牌在身，後防更係重災區，一個唔好彩，入到決賽防線都要大執位。皇馬情況稍為好啲，但孭住黃牌嘅中場沙比阿朗素同後衞沙治奧拉莫斯，都係不可或缺嘅絕對主力，而且全隊有4個球員有牌，決賽睇怕好難夫添出戰。
根據世盃同歐國盃決賽周規例，8強後所有球員嘅黃牌會洗清，確保唔會有球員因為4強攞黃牌而錯過決賽。雖然歐聯4強踢兩回合，球員有機會連攞兩張黃牌坐波監，但至少唔會好似今場有11個球員「孭牌」咁陰公。碧根鮑華咁話：「歐聯應該參考世盃同歐國盃制度，保證最好嘅球員可以出席決賽。」
4強判官旺德甲兵
至於隊長拿姆，就向今場執法球證卡斯沙爾求情：「我知道球證對吹罰比較謹慎，除非係嚴重惡意犯規，否則佢唔會輕易畀牌。」來自匈牙利嘅卡斯沙爾最近4次執法德國球隊嘅歐洲賽，德甲球隊全勝（見下表），當中拜仁上屆作客贏國米、今季主場贏曼城嘅歐聯，馬里奧高美斯當旺包辦3個入球，或者真係有價講喎！
皇馬孭簿名單
4.沙治奧拉莫斯
14.沙比阿朗素
15.法比奧干查奧
20.希古恩
拜仁孭簿名單
17.謝路美保定
21.拿姆
25.湯馬士梅拿
27.阿拉巴
28.畢斯杜巴
30.路爾斯古斯達禾
39.卻奧斯
「德甲福星」近年戰績
日期 比數 賽事
12/03/15 史浩克 4：1 川  迪 歐霸盃
11/11/23 利華古遜 2：1 車路士 歐 聯
11/09/27 拜  仁 2：0 曼  城 歐 聯
11/02/23 國  米 0：1 拜  仁 歐 聯 |
|
金睛卡
发表于 2012-4-25 10:54
变色卡
显身卡