邦迪比達聖保羅「大」打出手

猪拉多纳

26/04/2012
文： 朱楓

聽朝巴西盃16強首回合爆發「聖保羅州打吡」，邦迪比達會喺主場硬撼聖保羅。邦迪比達近期火力勁爆，遇着要爭職業生涯第300球嘅聖保羅射手路爾斯法比安奴，隨時大打出手，1.82倍入球大值得秤先！（開賽時間：周五早上8：50）

法比安奴爭入第300球

曾効力西維爾嘅前巴西國家隊首席前鋒路爾斯法比安奴，今季喺聖保羅上陣11場入11球，日前喺聖保羅州聯8強主場大勝巴拉干天奴4：1之戰梅開二度後，更以136球追平上世紀50年代名將馬連奴，升上隊史射手榜第8位。假如聽朝倒戈邦迪比達入波，路爾斯法比安奴更會取得職業生涯第300球，試問點會唔搏？畢竟呢位巴西前鋒嚟緊周末喺聖保羅州聯4強對山度士嘅大戰要停賽，今場完全冇必要留力！


上季取得巴乙第3，嚟緊將升上巴甲嘅邦迪比達近況回勇，繼巴西盃32強憑12碼擊敗戈亞尼恩斯晉級後，啱啱喺聖保羅州聯8強仲作客以3：2爆冷擊敗第1種子哥連泰斯，嚟緊周末4強戰對死敵SP瓜蘭尼嘅邦迪比達仲連續8場有波入，聽朝真係隨時同聖保羅鬥攻！


巴西盃賽制：為16強首回合，採主客兩回合淘汰制，若總比數相同，作客入球較多一隊晉級，再和則於次回合後隨即互射12碼決勝。