里爾讓得狠上盤唔怕跟

猪拉多纳

26/04/2012
文： 阿水

賭波從來都係長期作戰，紀律同心態控制係最緊要！上星期阿水賭足大半個星期一直有斬獲，點知一個周末失控，胡亂出擊即時將形勢逆轉由贏變輸，好彩星期日冷靜落嚟先及時收復失地，阿水喺度都奉勸大家，買波前記得停一停、諗一諗先好撳掣落注呀！


各地聯賽都開始步入尾聲，其中法甲都一樣精彩，蒙彼利埃同巴黎聖日耳門（PSG）喺聯賽榜叮噹馬頭。季前得到新班主注資大搞嘅PSG，踢到剩番最後5輪落後蒙彼利埃2分，贏唔到盃真係唔知主帥肥安點交代？

蒙彼利埃平手盤有蠱惑

不過咪話阿水小人之心，人人都追住PSG要搶分爭盃，個個都追買佢哋，你估莊家真係唔使開飯咩？事實上，PSG近排演出都係離奇失準，近6場聯賽只得2勝2和2負，唔多穩陣o架！更重要嘅一點係，今個周末佢哋係要作客第3位嘅里爾，後者今仗會有中埸重心夏薩特及時傷愈披甲，人哋有埋地利，砌低你PSG有乜出奇。


依家初盤已經係里爾讓平半同半球，個盤鬼咁辣，咪以為PSG受讓就有着數，計我話要主隊仲抵。另外蒙彼利埃作客近況麻麻嘅圖盧茲，又係有平手盤賭，係咪真係有咁大隻蛤乸隨街跳呀？