攻擊鐵三角上晒力 艾夫斯堡主勝趁熱食

猪拉多纳

26/04/2012
文： 亨格比利

瑞超開咧接近1個月，表現最Sharp醒嗰隊肯定係艾夫斯堡！呢支爭標分子最近連贏3場，中前場幾位猛將亦都全部上晒力，今晚對住鋒力嚴重受損嘅加爾斯有望為所欲為，1.62倍主勝趁熱食。（開賽時間：周五凌晨0：30）

加爾斯新星長抖

艾夫斯堡新季保留咗一班高質素嘅中前場球員，其中老將安達斯史雲遜同拉斯尼爾遜開咧冇耐已經各入兩粒，靚仔中場伊舒薩基仲巴閉，上仗對奧雷布洛射入70碼超遠程窩利之後，瑞典國內傳媒已經吹到呢球波勢必成為全季金球。呢隻艾夫斯堡攻擊鐵三角咁煞食，難怪開咧5戰贏足4場排榜首。


作客嘅加爾斯有後衞安格斯刑滿復出，不過陣中新星施歷克就喺上場聯賽傷出，賽後證實左腳重創面臨長抖9個禮拜，要知道加爾斯開咧至今只係入得4球，家陣再有呢位瑞典小國腳射手倦勤，橫睇掂睇都唔覺佢哋有本事偷雞。