祖記入球大好「路」

猪拉多纳

29/04/2012
文： 走肖

等咗55年至進行到嘅「皮蒙特打吡戰」，踢埋「第二回合」唔知又要隔幾耐再上演。路華拿今晚喺意甲主場對祖雲達斯，可以話冇任何包袱，與其死守悶球迷，不如踢快樂足球氹擁躉開心，加上爭標關頭祖記冇得留手，1.59倍入球大似乎最抵博！（now632台周日晚9：00直播）


皮蒙特位於意大利西北部，以往「皮蒙特打吡戰」喺意甲上演24次，祖記有13勝9和2負，但由於路華拿唔爭氣降班，直至今季佢哋重返意甲，兩隊事隔55年至再有機會交手，首循環祖記贏2：0。

路華拿等降班

路華拿周中2：1砌低拉素，造成有機會護級成功嘅假象，但明眼都睇得出，依家隊波距離護級安全線8分，降班只係時間問題，教練迪沙把口話希望阻止祖記贏波，為球迷創造美好回憶，但跟手又話，需要派12個球員落場，至能夠有效抗衡對方嘅攻守戰術體系，即係暗示隊波根本唔夠砌， 任人劏不如轟烈啲同祖記對攻玩「大」佢。


今季仍保持不敗身嘅祖記有射手馬特尼停賽，但波里路上場後備入替完場前絕殺切塞納，狀態對辦，呢場佢有機會得到更多上陣時間，足夠填補馬特尼嘅空缺。再講，最近祖記連贏7場聯賽勁入19球，平均每場攻入2.7球，依家佢哋只係領先次席嘅AC米蘭3分，為免臨衝線失錦標，當然要繼續贏。

橫數千軍

路華拿半場唔識贏


對上7場半場3次打和、4次落後。

最近9場主場5次冇波入，至叻係上仗贏拉素2:1。

祖記作客未輸過

近9場半場3次領先、6次打和。

今季連盃賽在內作客得9勝9和不敗。