巴塞踢風流波寧敲馬拉加

猪拉多纳

30/04/2012
文： 阿水

正所謂天下無不散之筵席，哥迪奧拿宣布下季唔教巴塞，唔只球迷覺得震撼，其實喺賭波界都一樣惹起唔少回響。莊家呢幾年對住呢股「地上最強」旋風，經常都損手爛腳，皆因佢哋真係勁到冇朋友，贏到你唔信，下季哥帥一走，話唔定係莊家重見光明之日。

馬拉加富豪班主撐場

其實巴塞今年戰績下滑，班大莊都執番唔少，家陣佢哋班波擺明喺西甲踢風流波，然後等踢埋場西班牙盃決賽收咧，球員真係未必太搏命。最慘係因為巴塞個招牌，都仲係吸引埋唔少上盤客追，就好似嚟緊周三場西甲快車主場對馬拉加，只係讓球半明顯見到莊家對「地上最強」有保留，話晒人哋都仲要為歐洲賽席位而戰，唔會任你砌o架！


再者阿水收到風，馬拉加個富豪班主艾泰尼前晚已經到咗西班牙，就係為尋晚佢哋班波對華倫西亞，以及周三對巴塞場波打氣。有班主督師，唔通唔搏命咩？巴塞讓波多，真係要馬拉加好過囉！


另外華倫西亞對奧沙辛拿場波，兩隊都要爭歐洲賽席位，雖然大家都近況麻麻，不過華倫有地利，讓夠一球個盤又幾硬淨，上盤都追得過。