兵工廠「-2」照嚼金絲雀

猪拉多纳

05/05/2012
文： 查理阿蛋

今晚英超早場有阿仙奴主場迎戰諾域治，兵工廠要保住歐聯席位就一定要贏波，撞着冇嘢好爭兼勢頹嘅「金絲雀」，就算讓到2球咁多都絕對讓得起，一於撐2.25倍嘅「讓球主勝」博阿仙奴嚟個小反彈啦！（有線200及300周六晚7：45直播）

諾域治風流波3連敗

聯賽錄得3連敗嘅諾域治喺呢3場賽事一共失咗11球，上一場對利物浦條後防線更畀蘇亞雷斯玩到一戙都冇，今仗對住技術同樣超班嘅尹佩斯，真係幾難有好結果。何況「金絲雀」依家只係踢緊風流波，未必有心去攻，教頭林拔仲表明近3場輸波，對球隊嚟講只係為下季準備嘅學習過程：「當佢哋下次面對相同敵人，就會識點樣應對。」咁嘅心態，今場輸多幾粒又有咩出奇？


廠仔防守穩少受靶


阿仙奴畀人嘅感覺不嬲都係攻強守弱，但係睇番今季數據，佢哋畀對手射門命中目標嘅次數只得127次，呢個數字，全英超只得防守出色嘅利物浦比佢哋少，證明由華美倫領導嘅防線夠晒硬淨，「金絲雀」想咬得入佢哋都幾難。


兵工廠賽前雖然排第3，但係近排連連失利之下，積分只係比排第5嘅紐卡素多1分，地位認真危危乎，萬一跌落第4而車路士又捧埋歐聯冠軍嘅話，來季就要轉踢歐霸盃，睇怕今場一班「廠仔」應該會醒醒定定，希望入多諾域治幾粒做番齣好戲畀球迷欣賞，而且尹佩斯啱啱獲選為今季英超最佳球員，肯定乘勢省番幾球力保歐聯席位！

橫掃千軍

阿仙奴主場失波少

‧ 今季主場失14球，防守力僅次於只失10球嘅曼城。

‧今季英超喺落後情況下，取得最多分數嘅球隊（20分）。

諾域治頭槌入波最多

‧單計近6場賽績，位列聯賽榜尾3。

‧今季頭槌入球最多嘅球隊，一共頂入15球。

猪拉多纳