紐卡素主場惡 曼城難破地獄

猪拉多纳

06/05/2012
文： 蘇豪

曼城面對聯賽爭冠最後一個難關，今輪作客硬撼紐卡素，曼城戰勝死敵曼聯後士氣高昂，大有不勝無歸之勢，不過「喜鵲」同樣喺上輪贏車路士踢出今季代表作，而且踏入2012年於主場未嘗敗績，成為英超頭號地獄主場，有力做攔路虎，受讓半一博下盤！（有線300及200台周日晚8時30分直播）


曼城取得聯賽四連勝重上榜首，但對手只屬風流波西布朗、諾域治，以及包尾大幡狼隊，上場對曼聯贏波，全因紅魔驚輸踢到走晒樣。講咗咁多，無非想話畀大家知，曼城近期根本冇受到真正考驗，正如主帥文仙尼所講，今次作客紐卡素一定難踢過上場曼市打吡，稍有差池，整季努力隨時一鋪清袋，球員能否喺巨大壓力下踢出水準，實在係一個大問號！

喜鵲爭歐聯無退路

紐卡素剛於歐聯席位爭奪戰作客擊敗車路士，能夠喺呢場硬仗贏波，進一步顯示呢支東北球會真係有料到，特別係射手柏比斯施斯踢到曉飛，腳風順到亂射都入。以往「喜鵲」主場威力甚強，踏入2012年更加犀利，佢哋對上十次主場出擊保持不敗，包括大炒曼聯3比0，上次輸波已經係上年十二月尾，曼城今場根本冇把握贏波。


曼城現時人腳完整，繼續靠「阿根廷孖寶」阿古路同泰維斯爭取士哥，紐卡素「塞內加爾黑雙煞」丹巴巴亞同柏比斯施斯同樣具分量，加上中場悍將迪奧迪傷愈復出，人腳亦齊，佢哋依家同熱刺鬥到叮噹馬頭，加上「三哥」阿仙奴昨晚失分，「喜鵲」為爭歐聯席位，決心絕對不遜曼城，主場受讓半一着數到暈，下盤有計！