杜塞爾多夫等畀哈化炒

猪拉多纳

德甲升降附加賽，德甲尾三哈化柏林與德乙季軍杜塞爾多夫進行兩回合賽事競逐來季最後一個德甲席位，今晚首回合賽事於柏林奧林匹克球場上演，次回合下周三凌晨於杜塞爾多夫主場舉行。杜塞爾多夫正受傷兵問題困擾，球隊亦嚴重缺態，作客難擋回復朝氣嘅哈化強攻，黑柴推介3.35倍哈化「讓球主勝」。（周五凌晨2時30分開賽）

呢場波如果安排喺季初踢，鹿死誰手尚未可知，但時至今日，杜塞爾多夫已經嚴重跌Watt，成個下半季17場聯賽只贏4仗，能夠捱到踢附加賽全靠食上半季老本，球隊成績急劇下滑主因傷兵眾多，而且個個都係關鍵人物，首席門將羅拔艾馬下半季傷愈復出冇耐又傷過，後防支柱蘭真尼基受小腿傷困擾多時，上仗最後一輪聯賽關鍵戰都冇落場，漢堡借將比斯達本來係球隊前線最強武器，但季尾一直受肌肉瘀傷困擾，無法參加正常操練，上仗亦只能喺最後十五分鐘落場，年屆34歲嘅首席射手路斯拿季尾狀態急跌，亦已宣布踢埋今季退休，整體戰鬥力已無法同季初相比。
靠僥倖捱到踢附加賽

杜塞爾多夫喺近9場德乙聯賽作客只曾一勝，上仗最後一輪面對踢緊風流波嘅杜伊斯堡，主場出擊兼喺上半場24分鐘已經踢多個嘅情況下只能賽和2比2，全靠聖保利同時以5比0大炒對佢哋威脅最大嘅柏達邦，僥倖以較佳靠得失球差保住附加賽資格，今仗作客面對質高一皮，喺季尾最後時刻回復狀態同士氣嘅首都球會哈化柏林，難逃大敗厄運。