哈化求翻身誓炒乙組仔

猪拉多纳

哈化柏林究竟會唔會做升降機，今晚德國聯賽附加賽首回合戰果將成關鍵。喺德甲排16位嘅哈化為咗護級，面對15年嚟未曾重返頂級聯賽嘅乙組「三哥」杜塞爾多夫，必定會搏甩髀，有力開出1.85倍主勝。（開賽時間：周五凌晨2:30）

今場係哈化柏林教練利赫高嘅倒戈戰，佢喺1979至80年帶領杜塞爾多夫期間曾奪德國盃，不過就話明今場冇情講，仲話1球都不能失添！上仗對賀芬咸梅開二度嘅中場賓哈迪拉，今場將會繼續扮演關鍵角色，球會經理皮爾特斯都對呢位愛將充滿信心：「佢上場一把握到機會就入到2球喇！」
杜塞爾多夫作客唔掂

杜塞爾多夫近8場作客聯賽只係贏過榜尾嘅卡爾斯魯厄，上場賽和杜伊斯堡都唔見得有說服力，尤其係入嘅第2球更帶有運氣成分，入到附加賽都算好彩，今晚要憑運氣保不失，真係難啲喇！
德國聯賽附加賽賽制：

由德甲第16名對德乙第3名，勝方將取得下季德甲資格，採主客兩回合淘汰制。若兩回合總比數打和，先計作客入球優惠，再和則在次回合90分鐘後加時30分鐘，加時續採作客入球優惠，若加時沒有入球，則互射12碼決勝。