德甲巨人難治恐蜂症

猪拉多纳

德國盃決賽打到嚟，德甲頂尖雙雄多蒙特與拜仁慕尼黑，於柏林奧林匹克中立場重量級對決。剛以破紀錄81分稱雄德甲嘅「蜜蜂兵團」多蒙特，矢志爭取球會史上首次「雙冠王」，面對力圖扭轉對賽連敗宿命嘅「巨人」拜仁慕尼黑，絕對勢均力敵，拜仁要喺90分鐘解決對手有難度，黑柴推介受讓平半嘅多蒙特下盤。

（無綫翡翠台周日凌晨2時直播）
多蒙特對賽4連勝

多蒙特今屆德甲以後上姿態反先拜仁，成功衞冕，而且自上季起直落4次對賽以2:0、3:1、1:0同1:0擊敗拜仁，成為「德甲巨人」剋星，球隊過去雖曾兩度捧走德國盃，但球會史上從未試過贏得國內雙冠，今場係佢哋本季最後一場比賽，亦係香川真司同巴里奧斯嘅告別戰，當然谷盡圖創歷史，多蒙特今仗料會由巴里奧斯取代輕傷嘅羅拔利雲度夫斯基掛帥，事實上球隊喺教練高普麾下每戰拜仁都有出色發揮，今仗於中立場再戰，形勢上毫不輸蝕。

拜仁雖然再一次喺聯賽向多蒙特稱臣，但經過歐聯準決賽淘汰強敵皇家馬德里，殺入5月19日喺自己主場安聯上演嘅決賽，全隊士氣同狀態都已經重返高峰，球隊過去喺德國盃有輝煌紀錄，其中4次同多蒙特交鋒，有3次成為最後贏家，包括2008年決賽加時贏2:1，對提升今仗信心應有幫助。
拜仁有歐聯後顧

不過德國盃對拜仁嚟講始終係小菜一碟，重要性遠遠不及下周末上演嘅歐聯決賽，眾將當然唔會去到盡，以免有損傷因小失大。何況拜仁今季於國內面對防線組織嚴密嘅勁旅都難獲甜頭，聯賽先後遭慕遜加柏同多蒙特雙殺，德國盃準決賽第三度遇上慕遜加柏，亦要苦戰至互射12碼至險勝過關，今仗遇上實力同狀態更勝一籌嘅多蒙特，要於法定時間內贏波復仇有難度，要讓波寧博多蒙特下盤。