曼市雙雄王者倒數

猪拉多纳

英超煞科日今晚10時全線開火，將會決出聯賽冠軍誰屬。曼市雙雄現時同得86分，榜首曼城球差領先8球，最後一戰主場對昆士柏流浪若能順利贏波，封王機會高唱入雲。次席曼聯形勢被動，作客新特蘭難望大勝收復失地，隨時會畀曼城戰果影響鬥志。
曼聯捉貓有難度 直路腳軟 形勢被動

曼聯哀兵作客新特蘭，「紅魔鬼」將帥自知大勢已去，上輪球員精神面貌甚曳，今次作客「黑貓」必定會畀曼城賽果影響心情，隨時贏都贏唔到，博「讓球主勝」！

（有線301及201台周日晚10時直播）
焗用毒瘤拉菲爾

曼聯去到季尾最後直路腳軟，上次對史雲斯明明需要大炒對手先有機會追近曼城，但球員踢落唔多起勁，最終只能贏二比○，對爭標無甚幫助。

由於守將基斯史摩寧加入十字軍，菲爾鍾斯會移入中路拍住里奧費迪南，換言之毒瘤拉菲爾達施華有機會復出打番右閘，防線絕對唔穩陣！

紅魔近五次作客新特蘭贏四場，今場能否贏波完全取決喺球員心態上，若能集中精神作戰贏面仍高，不過，佢哋會畀曼城戰果直接影響作戰情緒，一旦曼城晨早贏住幾粒，恐怕曼聯會散晒，作客讓波絕對唔抵玩。新特蘭主場向來硬淨，近十一場主場聯賽只輸一次，受讓有計！
曼城大起昆士柏 誓搔44年之癢

曼城希望一搔44年之癢奪取英格蘭頂級聯賽冠軍，真真正正成為曼市一哥，今晚主場對昆士柏流浪殺無赦，入球大細中位數改為3.5球，大盤仍然值得捧場！

（有線300及200台周日晚10時直播）
主場王Vs作客蟲

曼城今季經過起起落落終於行到最後一步，由於球差大幅領先曼聯，只要贏波就可封王，大軍今季聯賽主場十八戰十七勝一和，屬聯賽主場王，昆士柏流浪作客十八戰輸十三場，屬英超No.1客場蟲，兩隊無論人腳、實力同狀態都有距離，昆士柏流浪雖然都要護級，但實在冇乜條件搶分。

曼城夫添出擊，隨住射手泰維斯復出，大軍中前場進攻火力大增，加上王牌前鋒阿古路狀態大勇，中場重心耶耶托尼腳風亦順，今戰全軍上下打醒十二分精神作戰，決心大勝一場奪冠。昆士柏流浪防線唔多穩陣，早前曾作客車路士大敗一比六，今次對曼城有機會再次大敗收場。