保頓齊心 劫城逃生

猪拉多纳

《復仇者聯盟》最令人鼓舞嘅地方，就係即使鐵甲奇俠同美國隊長有心病，但最後都能夠團結一致、排除萬難獲得勝利。英超煞科日保頓為護級同樣要團結，今晚造訪無欲無求嘅史篤城，Katie睇好佢哋攞晒3分！（有線62周日晚10:00直播）

保頓家陣落後尾4嘅昆士柏流浪2分，煞科日唔單只要望昆士柏輸畀曼城，自己亦要做足本分砌低史篤城，淨係呢份非勝不可嘅決心，都足以令Katie向佢哋投以信心一票。美國隊長拯救地球，保頓隊長奇雲戴維斯亦要挺身而出，呢位35歲射手賽前就呼籲隊友要企出嚟做英雄，拯救水深火熱嘅保頓。
史篤城近10戰僅1勝

奇雲戴維斯仲以「火箭」勇奪世錦賽獎盃激勵自己，賽前特登約隊友篤番盤波Relax吓，查實「Super Kev」今年夏天就會約滿，離隊幾成定局，今場煞科戰隨時係佢老哥最後一次為保頓披甲，奇雲戴維斯當然想留番個美好回憶，率領球隊逃出生天啦！

史篤城畀大家嘅感覺好硬淨，但呢隊爛仔波家陣無欲無求，爭勝決心已經輸保頓幾條街，呢個亦係佢哋近10場聯賽有9場失分嘅主因。Katie研究過史篤城，發現佢哋除咗係英超入波最少嘅球隊外，就連射門及中框次數都係英超最削，保頓盡情搶攻，絕對有權反客為主。
Katie推介

保頓（勝）
微博傳情 \(^O^)/

Gaga嚟香港開騷，Katie都有去撐場，之不過小妹真係寧願留喺埼玉睇日本站Concert好過！事關Gaga喺日本完騷後直踩獻唱，相比喺香港足不出戶，日本Fans幸福好多！查實Gaga去過日本6次，仲試過義賣手帶幫地震災民籌款，如果Katie起清Gaga個底，今次日本之行，唔使淨係去迪士尼買紀念品咁齋啦！