祖記「主勝」歡送金童

猪拉多纳

意甲今晚煞科，出爐冠軍祖雲達斯會喺主場迎戰阿特蘭大，完場後祖記班球員會坐開篷大巴接受球迷祝賀，兼歡送迪比亞路，預計到時會有超過10萬球迷上街慶祝，雖然當地天文台話到時可能會落大雨，但相信無損「斑馬迷」嘅興致。呢場「歡送會」當然力捧1.63倍「主勝」！（now633及660台周日晚9:00直播）

祖雲達斯只要今晚場波保持不敗，就會成為91至92年球季嘅AC米蘭之後，另一支全季不敗奪得意甲冠軍嘅球隊。最緊要嘅係，効力咗「老婦人」19個球季嘅迪比亞路終於要講再見，相信隊友都會幫手大勝一場畀佢做告別作嘅！

對手阿特蘭大近7場作客6場冇波入，今季主場對祖記都要輸兩粒，今晚都係乖乖哋戥人開心罷啦！