港足加價時機未成熟

猪拉多纳

香港足球代表隊六月份將會安排兩場國際賽，分別係六月一日大球場對新加坡，仲有六月十日旺角場對越南，兩場波最多球迷討論嘅並非戲碼，而係票價，港隊對新加坡收八十蚊，對越南收一百，兩場套票係百五蚊！
對新加坡越南嫌收得貴

新加坡同越南兩支球隊，水平唔算高，同香港比較大家咁高咁大，本地波都係收開六十蚊，因此外界對波總今次突然大膽加價都好愕然。

對於今次加價，有球迷一時接受唔到，喺網上留言唔會入場，亦有唔少人士預言指港足加價將導致票房失收，得不償失。

其實本地波票價問題，今季季初已經討論過，其中大埔、深水埗、屯門同公民都主動以不同形式例如推出套票或直接減票價，以刺激入座率，至於本地波Big5互撼嘅賽事，都係公價六十蚊，入場數字如何大家都心中有數。

今屆省港盃有約四千人入場，二月底對中華台北嘅入場人數大約五千，可見追捧港足嘅捧場客，暫時都係得四、五千人左右，睇唔到有咩特別事件會令入場數字突然大升，今次出戰新加坡同越南，可以話加價時機尚未成熟，波總今次加價，似乎心急咗少少喇。