哈特斯菲爾德上盤飲勝

猪拉多纳

有魯迪斯喺度，哈特斯菲爾德可贏完再贏！英甲升班附加賽準決賽次回合，哈軍主場鬥米爾頓凱恩斯，首回合哈軍作客輕取兩粒，王牌前鋒魯迪斯抖夠復出又入波，米軍次回合焗攻啱晒主隊胃口，預料哈特斯菲爾德再贏冇難度，小讓平半捧上盤！（周三凌晨2時45分開賽）

哈特斯菲爾德本季英甲奪得殿軍，於附加賽準決賽鬥第五位嘅米爾頓凱恩斯，原本以為唔易踢，但一落場就知龍與鳳。哈軍領隊格雷臣於附加賽前收起魯迪斯兩場，等佢有番爭勝飢渴感；呢招果然奏效，大勇魯迪斯先開紀錄，最後贏二比○。現役蘇格蘭國腳魯迪斯本季已攻入三十九球，於英甲超晒班，今次再出場領軍，哈軍必有優勢。
米爾頓凱恩斯圖收失地

熟悉英甲朋友都知哈軍係實力分子，佢哋已連續三屆踢附加賽，經驗非常豐富；而且呢班波出名主場威力勁，球隊以穩健後防做根基，周時淨勝對手。

今場米爾頓別無選擇肯定要進攻，啱晒對手打穩守突擊。好多人話今場哈軍唔使贏，但落到場邊計得咁多，仲要係水準唔高嘅英甲賽事，拿仁就唔信主隊會留力，小讓平半必捧上盤。