全北「大」得起柏雷素爾

猪拉多纳

亞冠盃最後一輪分組賽今晚爆發，韓職總冠軍全北汽車喺H組主場對日本兵柏雷素爾，玩1.59倍入球大最着數。經過季初災難性低潮後，全北已回復頂級火力，撞啱柏雷素爾有「守護神」菅野孝憲缺陣，搞到「守備陣崩潰」，鬥攻開入球騷唔難。（now671台周二晚6:00直播）

H組4隊都有機會出線，全北有9分暫列榜首，今場和波都夠數，輸波就要寄望廣州作客武里南聯失分。至於得7分嘅柏雷素爾，贏唔到就拜拜，肯定上齊彈藥去南韓搏命。雖然全北喺頭兩場分組賽先後以1:5慘負FC廣州同柏雷素爾，但近期已克服教練崔康熙臨開季離隊嘅影響，信心返晒嚟。
柏雷素爾防線添傷兵

事實上，最近全北已經回復韓職總冠軍火力，射手李東國（圖）更喺上場分組賽梅開二度，況且幾年嚟佢响亞冠盃已經累積入咗17球，只差1球就平到艾薩德球員李安度保持嘅18球紀錄，又點會唔搏先？再講，今場全北有司職中堅嘅隊長趙星恒停賽，相信會踢得更進取，避免主場輸波令球迷失望。

其實柏雷素爾防線真係勁多麻煩，門將菅野孝憲因身體不適缺陣後，試過作客以2:5慘負廣島三箭，後衞增島龍也又加入傷兵名單，後防不穩仲要焗攻爭出線，玩1.59倍入球大應該最容易收錢。
亞冠盃賽制：

32支球隊分8組進行雙循環分組賽，每組首、次名躋身淘汰賽，小組首名將於一場過的16強淘汰賽獲得主場之利。