橫濱水手周末搶W

猪拉多纳

日職名牌球隊大阪飛腳季初戰績奇差，客場表現更加不知所謂，換帥後仍然未有起色，大軍本季喺各項賽事作客八戰僅得一場唔使輸波，戰績衰到冇朋友，星期六造訪全面回勇嘅橫濱水手凶多吉少，一於捧水手贏波！（周六下午1時開賽）

大阪飛腳早於亞冠盃出局，剛過去周中派出唔少副選敷衍了事，結果沒有懸念再輸，再一次喺自己地頭失利，對士氣毫無幫助。
水手回勇5連勝

經過休戰之後，中場重心遠藤保仁同守將今野泰幸等主力有充足時間回氣，不過佢哋戰績咁曳其實係心理問題多過體能問題；自從超級主帥西野朗離開，球員完全失晒信心，進攻唔順，防守唔穩，喺客場完全唔識踢，今季聯賽連盃賽八戰一和七負，頹勢未止，今仗憑乜搶分？

橫濱水手開季大脫腳，聯賽連盃賽頭十戰未嘗一勝，表現極曳。不過，自從上月尾擊敗神戶勝利船開齋後，水手將士信心返晒嚟，已經取得五連勝，老牌前鋒馬昆奴斯年紀一把，但把握力極高，威脅力不遜當年効力鹿島鹿角嗰陣。老實講，水手唔算好叻，要殺上前列爭標唔易，不過以球隊近期個勢，喺主場對住走晒樣嘅飛腳絕對有本錢贏波，水手上場聯賽盃已經留晒力，今仗目標明確，值得捧場！