巴斯蒂亞Hea住踢

猪拉多纳

法乙今晚收咧，伊斯特尼斯喺主場對巴斯蒂亞，1.5倍「讓球主勝」值得吼實。雖然伊斯特尼斯冇嘢好爭，但由於陣中幾名主力要博表現轉會，鬥心應該唔曳，相反巴斯蒂亞提早3輪攞聯賽冠軍，作客Hea踢唔似讓得起。（開賽時間：周六凌晨2:30）
伊斯特尼斯球員搏命等轉會

咪以為排第11位嘅伊斯特尼斯，真係諗住提早放暑假，實情佢哋有幾個球員約滿，成為其他法乙球會羅致目標，呢個時候當然係踢好呢場波博簽到肥約，更何況伊斯特尼斯近8場主場有4勝3和1負，不嬲都有搶分把握，假如能夠打沉巴斯蒂亞，轉會嗌高人工都大聲啲。

巴斯蒂亞之前以3:0掃低梅斯提早封王後，作客勒芒即刻淨吞3蛋，慘敗原因部分係佢哋派出幾件副選湊熱鬧，但講到底，戰意鬆懈至會輸到甩轆。再講，日前巴斯蒂亞教頭漢斯同老將洛頓，出席頒獎禮分別領取今季法乙最佳教練同最佳球員獎項，到底有幾着緊備戰，心照啦！