法林明高卡士勝乙組殿軍

猪拉多纳

新一季巴甲今晚開鑼，揭幕戰由新升班嘅利斯菲體育會主場迎戰法林明高。法林明高今季簽入唔少球星，再配合球星朗拿甸奴，淨係卡士都贏晒啦！對住啱啱換帥、仲重組緊嘅上季乙組殿軍利斯菲絕對有力響頭炮，平手盤捧客軍！（開賽時間：周日清晨5:30）

上季奪得巴甲第4嘅法林明高，喺2012年上半年成績超曳，喺自由盃分組賽就畢業，州聯賽又喺4強不敵華斯高。不過前巴西球星、現任法林明高體育經理仙奴，近日就話仲好信任教練辛坦拿同一班球員，有信心喺巴甲新季反彈。

雖然上季射入12球嘅堤亞高尼夫斯同中場韋利安斯杜明高斯離咗隊，但法林明高今季簽得莫斯科中央陸軍射手路夫、前曼聯中場基巴臣同前波圖中場伊臣，當中後兩者原來係法林明高09年攞巴甲冠軍嘅正選中場，兩人都話好期待再度合作，揭幕戰志在必得。
利斯菲換帥有排執

對家利斯菲體育會上季取得巴乙殿軍，自09年重返巴甲，點知教練馬蘇亞祖利亞卻選擇唔撈，改由上季搞到施亞拉降班嘅華拿文仙尼領軍。據講利斯菲嚟緊將會大清洗，以便籌集更多資金畀文仙尼買心儀球員，當中啱啱由施亞拉加盟嘅射手菲臘比艾斯維度，今晚就好大機會處子披甲，但佢始終加盟無耐，相信幫助有限，更何況前禾夫斯堡中場馬些連奴日前突然要求轉會，今晚會同有傷嘅射手謝爾費拉拿及中場咸美頓希尼奧一齊避戰，殘陣對住法林明高真係唔似有運行囉！