鯨魚天殘地缺撐櫻花

猪拉多纳

名古屋鯨魚下周中要出戰亞冠盃十六強，點知近期撞正中場傷兵潮，一大籮猛將集體受傷缺陣，包括星級外援丹尼臣哥度巴，今輪殘陣應付聯賽，主場出擊亦難讓大阪櫻花，蘇豪要「讓球客勝」！（周五晚6時30分開賽）

鯨魚要喺亞冠盃十六強遠征澳洲作客阿德萊德聯，對手已收咧，以逸待勞體力一流，非常惡踢，鯨魚若有心爭盃，今戰點都留番多少兵馬。不過，球隊中場最近湧現大批十字軍，想留都冇得留，除丹尼臣哥度巴外，中村直志、磯村亮太等中場大將統統唔出得，當地傳媒用「中盤壞滅狀態」嚟形容，可想而知鯨魚依家有幾大鑊！大阪櫻花主將清武弘嗣即將轉投紐倫堡，剩下光景不多，當然唔會欺場啦，趁鯨魚有後顧，可助櫻花立於不敗之地！