葡萄牙加操強攻馬其頓

猪拉多纳

今晚係熱身賽之夜，其中葡萄牙就會同馬其頓拍跳。葡萄牙守將米基爾盧比斯為咗今戰連婚禮都專登押後，維亞拿亦都積極加操博翻身，一對布拉加孖寶咁鬼認真，相信陣容不整嘅馬其頓肯定大難臨頭，1.36倍「讓主」咪嫌熱。（now630及632台、有線155周日凌晨0:00直播）
以國為先押後婚禮

爆冷入選葡萄牙嘅米基爾盧比斯，原定今日同未婚妻Monica結婚，估唔到呢位布拉加右閘咁愛國，竟然連婚都唔結住備戰今仗：「好在班親朋戚友明事理，個個都好支持我咁做。」至於因卡路士馬田斯受傷退隊先至獲補選嘅維亞拿，事隔5年重返國家隊梗係雀躍啦，呢位指揮官為咗取悅教頭，連日嚟係咁加操，態度勁積極。

積極嘅唔止布拉加孖寶，一班國腳好似C朗拿度同比比等球星亦都操到褲都甩，鬼咩！普通一課操練都吸引咗3,000球迷撐場，據講利亞拿球員今晚亦會拉隊入場睇波，咁多人撐唔交足貨點得呀？

對家馬其頓繼續由彭迪夫孭飛，但佢老哥今季喺拿玻里都冇正選，狀態唔慌好得去邊。況且中場祖路夫斯基不獲所屬球會蒙通聯放人，賽前又有指班國腳想逼主帥陶錫下台，咁多隱憂，今鋪輸鑊勁唔奇。