三箭大開「薩」戒

猪拉多纳

札幌岡薩多今晚喺日職主場對廣島三箭，唔輸就真係球壇不可思議事件。最近岡薩多傷兵名單愈來愈長，搞到教練石崎信弘連正常4人防線都排唔出，上星期被迫玩變陣，結果「3Back崩壞」慘吞鹿島鹿角7蛋。對家三箭始終火力有保證，射手佐藤壽人更加話要入夠30球做神射手，客W值得捧場。（now633及660台周六下午1:00直播）
札幌岡薩多鬧兵荒

岡薩多升班後簡直黑到爆，依家個傷兵名單水蛇春咁長，最近更加有前鋒前田俊介同後衛岩沼俊介傷埋，加上前鋒神翔太同後衞荒野拓馬被日本U19徵召，個天好似要玩死佢哋至肯收手。其實岡薩多上星期被迫變陣打3後衞，經已要捧7隻蛋返屋企，成為球會史上聯賽最大敗仗，呢場對住火力更強嘅三箭，即使主場出擊都唔似偷到雞。

近期三箭表現飄忽，不過隊長兼射手佐藤壽人開季前講過，由於李忠成已經離隊，冇人同佢爭波射，所以今季要入夠30球登上日職神射手寶座。當時好多人以為佐藤壽人飲大咗，但經過12場聯賽，佢已經有9個入球，佢咁給力，無非係希望日本國家隊教頭沙哲朗尼知道，長期冷落佢係大錯得錯，今場佢對住札幌豆腐防線，連中三元都唔出奇呀！